السلام عليكم و رحمة الله و بركاته
بسم الله و الصلاة و السلام على رسول
اهو جه يا ولاد اهو جه يا ولاااد.. :)
بيوحشنى أوى الفصل دا
بحبه جدا بجد .. و معرفش ليه
أى نعم هو برد و تكتكة و الناس ياعينى بتلبس الدولاب كله
بس بجد الله عليه الفصل دا
برغم انه برد جدا لكنى بحسه فصل الدفا
دفا القلوب
اول ما الجو يبرد و الهوا يبقى بارد اوى كله بيسيب الشارع و الفسح و الناس بتدخل بيوتها و تقفل عليها بابها و تتلم العيلة كلها مع بعضها و يمكن متلموش من زمان اوى و ياكلوا سوا و يتكلموا سوا و يضحكوا سوا و يشربوا شاى سوا
كأنهم بيتدفوا ببعض
أو تخيلوا قد اية احساس جميل اوى ان الجو برة تلج و المطر نازل يغسل الشوارع و البيوت و قبليهم بيغسل القلوب و انت متدفى تحت البطانية مع كوب من الكاكاو الساخن و فى ايدك كتاب بتذاكر فيه او بتقرا فيه لو غمضنا عيننا للحظة و تذكرنا نعمة الله علينا انه آوانا تحت سقف شايل عنا المطر و رزقنا بشبابيك متقفلة علينا تحوش عننا البرد و كمان رزقنا بأغطية نتدفى فيها و مشروبات ساخنة و غيرنا ياعينى محروم مش لاقى حتى سقف كوخ يؤويه ساعتها فعلا تقول "الحمد لله الذى أطعمنا و سقانا و كفانا و آوانا فكم ممن لا كافى له ولا مؤوى"
قلوبنا ساعتها تتدفى بالرضا عن الله و نلاقى كل حاجة فينا ساعتها بتقول اللهم لك الحمد
ولو ربنا رزقنا بعبادة التفكر وقعدت تتأمل المطر و هو نازل من السماء و تتأمل البرق و الرعد و تحس ان الصوت محاوطك من كل مكان بتحس ساعتها على اد ما انت كريـــــم على اد ما انت قادر ياربى
"هُوَ الَّذِي يُرِيكُمُ الْبَرْقَ خَوْفاً وَطَمَعاً وَيُنْشِئُ السَّحَابَ الثِّقَالَ{12} وَيُسَبِّحُ الرَّعْدُ بِحَمْدِهِ وَالْمَلاَئِكَةُ مِنْ خِيفَتِهِ وَيُرْسِلُ الصَّوَاعِقَ فَيُصِيبُ بِهَا مَن يَشَاءُ وَهُمْ يُجَادِلُونَ فِي اللّهِ وَهُوَ شَدِيدُ الْمِحَالِ{13}" الرعد
.. لازم نحسها دى ربنا بيرينا آياته بيورينا قدرته عشان نقدر نستشعر عظمته .. عشان نحس بجد اد ايه بنعبد إله عظيـــم قادر و كريم و رحيم مفيش أحن منه .. اللهم لك الحمد
تحسوا و المطرة نازلة اننا نفسنا تغسل قلوبنا و تغسل نفوس الناس من الغل و الحقد و الشر
تحسوا اننا نفسنا تغسل ذنوبنا و تمحى آثارها
تحسوا اننا نفسنا تغسل الحزن اللى عشش فى قلوب كتير و تحيي القلوب الميتة و تنبت فيها بذور الفرحة و السعادة
تحسوا كأنكم شايفين الأراضى و هى بتتروى .. كأننا شايفين رزقنا و ربنا بيسوقه لينا اللهم لك الحمد يارب
"فَلْيَنظُرِ الْإِنسَانُ إِلَى طَعَامِهِ{24} أَنَّا صَبَبْنَا الْمَاء صَبّاً{25} ثُمَّ شَقَقْنَا الْأَرْضَ شَقّاً{26} فَأَنبَتْنَا فِيهَا حَبّاً{27} وَعِنَباً وَقَضْباً{28} وَزَيْتُوناً وَنَخْلاً{29} وَحَدَائِقَ غُلْباً{30} وَفَاكِهَةً وَأَبّاً{31} مَّتَاعاً لَّكُمْ وَلِأَنْعَامِكُمْ{32}"
سورة عبس
بجد فصل الشتاء دا كله تأمل .. ربنا ميحرمناش من فضله و نعمه علينا يارب
المهم سبحان الله قرأت على النت عن فصل الشتاء انه
"...الشتاء غنيمة العابدين وربيع المؤمنين"
تأملوا كدا الحديث الذي رواه مسلم عن أنس رضي الله عنه: (أن رسول الله صلى الله عليه وسلم كان إذا أمطرت السماء حسر عن منكبيه حتى يصيبه المطر ويقول: إنه حديث عهدٍ بربه)
عن عمر رضي الله عنه قال:
'الشتاء غنيمة العابدين'. رواه أبو نعيم بإسناد صحيح
ومن كلام يحيى بن معاذ:
'الليل طويل فلا تقصره بمنامك، والإسلام نقي فلا تدنسه بآثامك'.
و عن ابن مسعود رضي الله عنه أنّه قال:
'مرحبًا بالشتاء، تنزل فيه البركة ويطول فيه الليل للقيام ويقصر فيه النهار للصيام'.
ومن درر كلام الحسن البصري قال:
' نعم زمان المؤمن الشتاء ليله طويل يقومه، ونهاره قصير يصومه'.
وعن عبيد بن عمير رحمه الله أنّه كان إذا جاء الشتاء قال:
'يا أهل القرآن! طال ليلكم لقراءتكم فاقرؤوا، وقصر النهار لصيامكم فصوموا'.
قال رسول الله صلى الله عليه وسلم:
«الصوم في الشتاء الغنيمة الباردة» رواه أحمد وحسنه الألباني .
مش بقولكم فصل الدفا
أعاننا الله على ذكره و شكره و حسن عبادته
